ما بتقدر تشوف لون ما عندك ليهو اسم

من سنين قعدت أربعين دقيقة أشرح لمهندس junior ليه نسخة من دالة غلط والتانية صاح. رسمتها ليهو. شغّلت الاتنين قدامو. كان بيهز راسو مع كل خطوة، وفي الآخر قال لي بكل صدق وما مستحي: "الاتنين شكلهم واحد عندي."

وفعلاً كانو شكلهم واحد عندو. كان منتبه، وكان ذكي. ما عندو خانة يخت فيها الفرق، فعينو اتزحلقت من فوق الكلام وما اخدت المعني، زي ما عينك بتتزحلق من فوق كلمة بلغة ما بتعرف بتقراها.

وأنا بفتكر المحادثة ده كل مرة زول يقول لي انو برنامج تدريبي "غطى" حاجة.

اللون الما زول قادر يوصفو

في لون اسمو Olo. بينتج من تحفيز فئة ضيقة من مخاريط الشبكية مباشرة، وقاعد برة المدى البتوصلو ليك الرؤية العادية. الناس الشافوهو بيقولو ساطع بشكل مستحيل، وبعد داك على طول بيعتذرو عن الوصف.

الكل بيمد إيدو لـ "تركوازي غامق"، والكل بيقول في نفس النفس انو الوصف ده غلط.

جملة أدق ما حتنفع خالص. المستمع ما عندو خانة يودي ليها الحاجة ديه، فكل تشبيه بينزل في أقرب خانة موجودة وبيتلوي بهدوء عشان يدخل فيها. والمستقبِل هو الناقصو التصنيف.

العيون بتخلي الحالة واضحة، لكن غياب التصنيف هو الحالة الطبيعية لأي زول بيتعلم أي حاجة.

كل مجال مليان Olo

الخبرة، في جزء كبير منها، هي انو عندك تصنيفات الناس التانية ما عندها. الخبير بيشوف عدد حاجات مختلف في نفس المنظر.

كل زوج فيهو ده حاجة المبتدئ ممكن يشوفها مرتين، ويسجلها كانها حاجة واحدة.

فلما زول يقول ليك الكورس "غطى" الموضوع، اسألو غطى شنو. إنت ممكن تغطي فرق المتعلم أصلاً ما قادر يدركو. وده بيحصل طول الوقت. المادة كانت صحيحة، والشرح كان واضح، والكويز اتعدى، والتصنيف ما اتكوّن أبداً في دماغ المتعلم.

ما ممكن تشرح تصنيف وتخلقو من الشرح بس

معظم البرامج بتغلط هنا، وهو غلط بريء، لأنو الشرح هو الحاجة البتحس انها تدريس.

إنت بتتعلم تسمع الفرق بين “ح” و “ه” من انك تسمع الزوج، مية مرة، وتخمّن، ويقولو ليك طوالي صحيت ولا لأ. خبراء الادوية، وأطباء الأشعة، ولاعيبة الشطرنج كلهم متبنيين بنفس الطريقة. البحوث بتسميهو التعلم الإدراكي؛ وعملياً هو بسيط لدرجة محرجة:

1. ورّي أزواج. المثال الواحد ما بيعلّم حاجة. الفرق هو موضوع الدراسة، والزوج هو الوحدة.

2. خليهو يلتزم بإجابة قبل ما يشوفها. التخمين بيعمل توقع، والتوقع الغلط هو البيخلي التصحيح يثبت. التعرّف من غير التزام ما بيعمل حاجة.

3. الـ feedback لازم يكون في ثواني و الإشارة لازم توصل والتخمين لسه في الذاكرة العاملة.

4. مئات التكرارات القصيرة. عشرة دقايق يومياً بتغلب ورشة عمل يوم كامل بفرق كبير.

ده أقرب لتمرين من محاضرة، وهو غير جذاب لدرجة انو نادراً ما بينجو من ميزانية التدريب.

ما في زول بيكتب "عملنا ٣٠٠ بطاقة تعليميه" في التقرير السنوي.

المرة الجاية وإنت بتبني كورس، أو بتراجع واحد، دوّر على الأزواج. اسأل: شنو الحاجتين المتعلمين عندك شايفنهم حاجة واحدة؟

مقالة Olo هنا، وتستاهل خمس دقايق من زمنك.