18 مليار، وخمسة مليون متدرب، ولابتوب بيطلع قبل نظام تشغيلو: ملخص ليب ٢٠٢٦ كامل

الرياض، 5 سبتمبر ٢٠٢٦، من ارض ملهم. الأرقام كما نقلتها الجهة المعلنة أو وكالات الأنباء السعودية.

المجاميع، يوم بيوم

اليوم الأول أقفل على "أكتر من ١٥ مليار دولار". اليوم التاني زاد حوالي ٢٫٥ مليار. اليوم التالت زاد ٨٥٧ مليون. واليوم الرابع من غير ارقام معلنه خالص، وطلع تقريباً أهم يوم في الأسبوع.

خلينا نقول ١٨٫٤ مليار دولار في تلاتة أيام، مقابل ٢٢٫٤ مليار في أول يومين من ٢٠٢٥. والشكل تقريبا نفس السنة الفاتت، يوم أول ضخم وبعدو نزلة حادة. اليوم الأول هو الصفقات المتفاوض عليها من قبل الحدث؛ وباقي الأسبوع هو الحاجة الاتفقو عليها في المعرض. لو قريتها كده، اليومين التاني والتالت هم الرقم الأصدق، والاتنين نزلو أكتر من النص.

وفي فرق تاني، وأخد مني لحدي اليوم التالت لمن شفتو. اليوم الأول السنة الفاتت كان صف شيكات بأسماء: Groq وأرامكو الرقمية بـ ١٫٥ مليار، وSalesforce بـ ٥٠٠ مليون، وDatabricks بـ ٣٠٠ مليون، وTencent Cloud بـ ١٥٠ مليون، وSambaNova بـ ١٤٠ مليون. اليوم الأول السنة دي هو stack شركة واحدة. القيمة المالية في اليوم الأول قريبة من السنة الفاتت، بس بقت متركّزة في شركة واحدة، ولو عاينت حتلقي انو السنه ده الفكره كلها في التوسع والشراكه الاستراتيجيه بعد ما شوط البناء اتلعب.

اليوم الأول: الـ stack

معالي الوزير عبدالله السواحه افتتح بأرقام الاقتصاد: الاقتصاد الرقمي طالع ٦٩٪ من أول ليب في ٢٠٢٢، حيث قفز من ١١٨ لي ١٩٩ مليار دولار، وظائف التقنية حوالي ٤١٠ ألف من حوالي ١٥٠ ألف؛ تسعة يونيكورن؛ والأول عالمياً في الجاهزية الرقمية. ومن القاعة كمان: النساء ٣٦٪ من القوى العاملة التقنية، وأكتر من ٣٬٠٠٠ خادم مصنّع محلياً اتصدّر، و٨٠ كم² أراضي وأكتر من ١٢ غيغاواط طاقة مخصصة لمراكز بيانات الذكاء الاصطناعي، وأكتر من ٢٠ كابل بحري بحلول ٢٠٣٠. ووصف التحوّل انو من مستورد للتقنية لي مصدّر ليها.

وبعدها HUMAIN أخدت أغلب الهوا. كل الأعلنتو بيتلم في stack واحد.

في اطار الحوسبة، مراكز بيانات AMD وCisco هي البنود الوحيده الأسبوع ده الوعدت باشياء ملموسه في ارض الواقع: أنظمة MI355X مع شبكات Cisco Silicon One، شغّالة كـ GPU-as-a-service في البيئات الانتاجيه، وموصوفة كأكبر نشر استدلالي لـ AMD بره أمريكا.

HUMAIN بتدخّل ١٣٬٠٠٠ معالج AMD للخدمة خلال ٢٠٢٦، وبعدين بتزيد لحد ٢٥٠ ميغاواط من النص التاني من ٢٠٢٧، وبتستهدف واحد غيغاواط بحلول ٢٠٣٠ على سلسلة MI400. وجنبو سحابة NVIDIA HGX B300 Blackwell Ultra، HUMAIN بتقول استخدام العنقود فيها فوق ال٩٠٪، وماشة لي انها تصل حوالي ٣٥ ميغاواط منتصف ٢٠٢٧.

وبناء xAI السعودي، الاعلن عنو أول مرة في منتدى الاستثمار السعودي–الأمريكي السنه الفاتت بيبدأ بـ ٥٠ ميغاواط ويوصل ٥٠٠، بحوالي ١٨٬٠٠٠ معالج NVIDIA GB300 في أول عنقود ونشر Grok على مستوى الدولة.
وTogether AI أخدت شراكة ٢٥٠ ميغاواط بهدف معلن ٥ مليار دولار إيراد سنوي في أول سنة تشغيلية. وDataVolt بدأت الحفر في ١٠٠ ميغاواط في منطقة أوكساچون بنيوم بخطه انتهاء في العام ٢٠٢٨، كأول مرحلة من مجمّع مخطط ليهو بسعه ١٫٥ غيغاواط.

وAWS التزمت ب ٥٠ ميغاواط في الـ AI Zone تبعها بحلول ٢٠٢٨، ومنطقتها السعودية على الخطه للاطلاق في ديسمبر ٢٠٢٦ بدعم ٥٫٣ مليار دولار. وcenter3 بتاعة stc بتطوّر سعة من ٢٥٠ ميغاواط، وعليان الوتيد حصر الشراكة مع HUMAIN في تلاتة: مراكز البيانات، والربط، والتسويق. ومنطقة مايكروسوفت Saudi Arabia East، بتلاتة مناطق توافر، بتشتغل في نوفمبر.

علي مستوى النماذج اللغوية: HUMAIN M3، نموذج عربي بأوزان مفتوحة، مدرّب على أكتر من تريليون token عربي. وHUMAIN Voice، العندها القدره علي التعامل مع لهجات المنطقه (السعودي والمصري والشامي والمغاربي) كأهداف لهجات منفصلة. وALLAM، الجيل الفات من نموذجهم متاح علي الكلاود المحليه، والان تقدر توصلو عن طريق Amazon Bedrock وMicrosoft Foundry، وHUMAIN Fabric ومدرجة في متجر AWS. وReflection AI حتشغّل نماذجها على بنية HUMAIN جوة المملكة.

قرار الأوزان المفتوحة ل M3 هو تقريبا احسن حاجة حصلت الأسبوع ده لأي زول بيبني بالعربي، والموديل الأساسي ليهو هو MiniMax-M3، من افضل الموديلات المفتوحه المصدر في الفتره الاخيره.

على مستوى التطبيقات: HUMAIN ONE حتجي في حزمه Microsoft 365 Copilot على Azure، وفيها وكلاء جاهزين بالعربي، وهدفها مليون مستخدم في الشرق الأوسط وأفريقيا خلال الفتره الجايه.

الأجهزة ونظام التشغيل: Horizon Ultra مع Qualcomm: Snapdragon X2 Elite، معالج Oryon بـ ١٨ نواة، Adreno GPU، وHexagon NPU. Windows، وطلبات المؤسسات حتكون متاحة من ٢٠ سبتمبر ان شاء الله، والسعر ما معروف الى الان، والهدف مليون جهاز في الشرق الأوسط وأفريقيا بحلول ٢٠٣٠. وHUMAIN OS، اللي طارق أمين بيسميهو المنتج الحقيقي لشركة هويمين، طلع الاساس فيهو لينكس و ذكاء اصطناعي مدمج مطوّر بالشراكة مع KORA Systems، وحينزل تجارياً في ٢٠٢٧. يعني الجهاز الرئيسي حيطلع بنظام تشغيل تاني قبل ١٥ شهر.

الذكاء الاصطناعي الفيزيائي: Applied Intuition كان ليهو وجود كبير وحيبدأ بالشاحنات الذاتية القياده، والهدف آلاف المركبات على سلاسل الامداد اللوجستية السعودية بحلول ٢٠٣٠.

باقي المعرض

في جهات كتيرة غير HUMAIN شغالة في خارطة الذكاء الاصطناعي هنا، والصف التاني كان فيهو البرامج الشغّالة.

عِلم جات لي ليب كشريك حلول الأعمال تحت شعار "ذكاء يمهّد الطريق"، وعرضها هو الرقم الوحيد في المعرض ده البيوصف ذكاء اصطناعي بيقابل المواطنين الان: أكتر من ٣٠ مليون مستخدم في أكتر من ١٦ قطاع، وأكتر من ٣ مليار معاملة رقمية في السنة، وأكتر من ٣٥٠ خدمة إلكترونية، وأربعة مكاتب دولية. علم ما أطلقت منتج جديد. عرضت ذكاء اصطناعي غير مرئي ومحسوس (أتمتة العمليات، ودعم القرار، وكفاءة التشغيل)، وعرضت الاتعمل وحصادو، واعلنت برامج جديدة لرواد الأعمال والمنشآت الصغيرة. لو في نشر في المملكة حيخلي نموذج عربي قدام تلاتين مليون زول، شكلو أقرب لي علم بحكم قاعده مستخدمينها الكبيره في المملكه والمتوسعة في المنطقه.

مجموعة stc، الشريك الاستراتيجي للسنة الخامسة على التوالي، عرضت جانب البنية التحتيه والشبكات من نفس القصة، وcenter3 هي أداة السعة عندها.

أرامكو الرقمية أطلقت iCONNA، منصة ذكاء اصطناعي صناعي على الحافة، وأرامكو وقّعت مجموعة اتفاقيات ومذكرات في الأمن السيبراني والذكاء الاصطناعي الصناعي وتوطين التقنيات الحرجة. وأمين الناصر وصفها كزخم استثمار بيخلي المملكة رائدة في الذكاء الاصطناعي والحلول الرقمية.

HP عملت منتجات أكتر من أغلب الناس: HP Agent One، وكيل ذكاء اصطناعي مؤسسي بيتعامل مع طلبات خدمات تقنية المعلومات بالعربي؛ وFlowMaster لأتمتة المستندات والامتثال؛ وHP Garage 2.0، حاضنة شركات ناشئة؛ ومركز تميّز بحث وتطوير في الظهران بيشتغل على نماذج لغوية عربية، بما فيها اللهجة النجدية. وHP كمان وسّعت "صُنع في السعودية" مع الفنار لتجميع خوادم Gen12 ProLiant محلياً، وفتحت مركز ابتكار سعودي مع Intel.

Think أطلقت Think Grid، حوسبة ذكاء اصطناعي بالاشتراك من منشأة Tier III في الرياض، مبنية على SuperNode فيهو أربعة مسرّعات NVIDIA RTX PRO 6000 Blackwell بـ ٣٨٤ غيغابايت ذاكرة، بتديرها برمجيات ILM بتاعتها.

Lenovo كشفت أول لابتوب مصنّع في السعودية، مع "علات"، ونقلت الشراكة من بناء القدرات لي إنتاج فعلي. وده تاني خبر لابتوب محلي في الأسبوع، وهو الوحيد الوراهو مصنع.

Nokia فتحت مركز بحث وتطوير سعودي لبرمجيات الـ 6G وأتمتة الشبكات بالذكاء الاصطناعي. وAMD ووزارة الاتصالات ومنظمة التعاون الرقمي أطلقو برنامج مطورين مشترك حوالين ROCm وتدريب على أخلاقيات الذكاء الاصطناعي. وAdobe حطت ٤ مليار دولار مساهمة في الاقتصاد الإبداعي السعودي خلال اتناشر شهر، زائد سنة وصول مجاني لأدواتها لـ ٢٧ مليون مقيم مؤهل. وموبايلي وBytePlus حيفتحو أول منطقة سحابية عامة لـ BytePlus في الشرق الأوسط وأفريقيا، في الرياض. وسدايا شغّلت DeepFest جنب المعرض الرئيسي: أكتر من ٥٠ جلسة، وأكتر من ١٠٠ متحدث من ١٧ دولة، و١٠٠ علامة. ووزارة الموارد البشرية والتنمية الاجتماعية، مع وزارة الاتصالات ومايكروسوفت وGulf Intelligence، أطلقت مركز التميّز للذكاء الاصطناعي للمهارات الوطنية وتبنّي الذكاء الاصطناعي في سوق العمل.

اليوم التاني: السعة

تقريباً كلو مراكز بيانات. المعمر لأنظمة المعلومات حطت ١٫٢ مليار دولار في التوسعة، وإجمالي سعتها بقى ١٩٢ ميغاواط. NHC Innovation أعلنت ٨٨٠ مليون دولار لوادي خزام الرقمي، بتوسّع لي ٦٥ ميغاواط بحلول ٢٠٣٣، مع NAVER Innovation وBytePlus كأول عميلين مرتكزين. وموبايلي وBytePlus التزمو بأكتر من ١٥٠ مليون دولار للمنطقة السحابية في الرياض. وVision Invest ومؤسسة التمويل الأفريقية حطو ٣٠٠ مليون دولار في WIOCC لألياف بحرية وأرضية تربط السعودية بشرق أفريقيا.

خُد الأرقام دي زي ما هي واجمعها، الأسبوع حط حوالي ٢٫٧ غيغاواط نوايا مقابل ٤٦٧ ميغاواط شغالة. دي حسبتي أنا، وفيها تكرار: هدف AMD بغيغاواط جواهو الـ ٢٥٠ ميغاواط، وxAI بـ ٥٠٠ جواها الـ ٥٠ الأولى، ومرحلة أوكساچون شريحة من ١٫٥ غيغاواط. نصّفها، وتبقى برضو حوالي تلاتة أضعاف الموجود.

والسؤال الأنفع هو الحاجات دي بتجي متين. شيل أي حاجة ما ليها سنة معلنة، والمنحنى بيطلع أرفع من العنوان بكتير:

ما في حاجة مؤرّخة بتنزل في ٢٠٢٦ أصلاً. والمنحنى الملتزم بيهو ما بيعدّي السعة الشغالة اليوم قبل ٢٠٣٠، وأكتر من نص الحاجة البتوصّلو هناك هدف واحد لـ AMD بعدو أربع سنين.

اليوم التالت: المال بيصغر ويبقى أمتع

٨٥٧ مليون دولار، منها حوالي ٢٩٣ مليون رأس مال مغامر في إحداشر صفقة: تسعة جولات بـ ١٢٦٫١٥ مليون، موزعة على الذكاء الاصطناعي والفنتك والسفر والألعاب والموارد البشرية وخدمات السيارات الرقمية؛ وصندوق جديد وتوسعة صندوق تاني بـ ١٦٦٫٧ مليون بينهم، يعني صندوق ١٠٠ مليون دولار سعودي–كوري للتقنية العميقة من Ula Capital وFuturePlay، وImpact46 وHALA وصّلو أداة تمويل المنشآت الصغيرة لي ٦٦٫٧ مليون. والفنار التزمت بـ ١٥٠ مليون دولار لتصنيع مكونات مراكز البيانات محلياً، وده سلسلة التوريد التحت كل ميغاواط فوق.

لو مؤسس شركة سألني أقرا ياتو يوم عشان المال، بقول ليهو ده. اليوم الأول كان بتاع الـ hyperscalers والرائد السيادي؛ اليوم التالت فيهو جولات شركة ناشئة بتقدر تجيبها.

اليوم الرابع: اليوم الما زول سعّرو

اليوم جاء بعدد رؤوس بدل رقم بالدولار، والعدد ده أكبر رقم في الأسبوع.

وزارة الاتصالات والأكاديمية السعودية الرقمية وGoogle حطو برنامج Gemini قدام مليون طالب جامعي. ومايكروسوفت فتحت أكاديمية ذكاء اصطناعي بمليون متدرب في المرحلة الأولى، وبتوسّع لي تلاتة مليون بحلول ٢٠٣٠، وزادت مركز تميّز "الذكاء العربي". وServiceNow أطلقت "السعودية إلى الأمام بالذكاء الاصطناعي" بـ ١٫٢ مليون مستفيد بشهادات مهنية. وScale AI التزمت بـ ١٠٠ ألف زول في أربع سنوات في برنامج اسمو "ألف" للذكاء التوليدي التطبيقي. وIntel أخدت ١٠٠ ألف كادر وطني. وArtifact Academy أخدت أكتر من ٢٠ ألف متخصص بحلول ٢٠٣٤. وSchneider Electric أخدت ١٠ آلاف بحلول ٢٠٣٠. وشراكة أكاديمية الذكاء الاصطناعي مع We Cloud Data أخدت ٥٠٠ معلم و٥٠٠ أكاديمي و١٬٠٠٠ رائد أعمال حضورياً، و٣٥ ألف افتراضياً. وشراكة مع منصة تواصل اجتماعي زادت ٢٠ ألف في الحوسبة الجغرافية والواقع المعزز والسلامة الرقمية والتسويق.

اجمع الأهداف الرئيسية، تطلع حوالي ٥٫٥ مليون مقعد تدريب متعهّد بيهو، في بلد تعدادو حوالي ٣٥ مليون. دي حسبتي أنا، وأكيد فيها تكرار: ما في حاجة بتمنع طالب واحد يكون في مليون Google ومليون مايكروسوفت وشهادة ServiceNow في نفس الوقت. خصّم منها زي ما تحب، وتبقى برضو أكبر التزام في الأسبوع من ناحية الوصول، والوحيد الموجّه لجانب الطلب.

وهو كمان اليوم الأضعف في المحاسبة، ولمن ترسم التعهدات مقابل مواعيدها بتشوف ليه.

الميغاواط بينقاس بعدّاد. ومليون متدرب رقم ما زول حيدقّقو أبداً، واتنين من أكبر تلاتة تعهدات ما عندهم تاريخ نهاية خالص، وكل شريك من دول عندو مصلحة تجارية واضحة انو المتدرب يتعلم منصتو هو.

شنو الاتعرض

النسخة الخامسة، شعارها "إلى عوالم جديدة"، في مركز الرياض للمعارض والمؤتمرات في ملهم: أكتر من ١٬٠٠٠ متحدث، و١٬٨٠٠ علامة عالمية، و٦٠٠ شركة ناشئة، و١٦ منصة، وأكتر من ٢٠ مسار. وRocket Fuel أخدت أكتر من ٣٬٠٠٠ طلب ونزّلتها لي ١٠٠ متأهل بيتنافسو على مليون دولار بدون حصص. وليالي ليب شغّلت أكتر من ٦٠ فعالية في أكتر من ١٥ موقع. ليزا سو وتشاك روبنز كانو على المسرح؛ وNVIDIA وGoogle وMeta وUber وRoblox وLenovo وNokia كانو في القاعات.

وفي أربعة أيام ما شفت عرض واحد باين انو على قضبان. روبوتات Unitree الرباعية والبشرية، وA2 Ultra بتاع AGIBOT، وواجهة إشارات الدماغ من COGNIXION، وطيّارات توصيل، وروبوتاكسي وتاكسي طائر. والعرض البقى معاي هو POLYMEDX بتاع Compal، كرسي متحرك روبوتي ذاتي للمستشفيات، شغّال أصلاً في أقسام طوارئ في تايوان، بينقل مرضى بين الأقسام تحت إشراف بشري وبزر إيقاف طوارئ. الذكاء الاصطناعي الفيزيائي البيمشي جنب مريض مشكلة حوكمة تانية خالص عن الشات بوت، وده كان العرض الوحيد الزول فيهو قال لي الكلام ده من غير ما أسأل.

وحاجتين ما اتعرضو. ما زول شغّل M3 محلياً على Horizon Ultra، لا في اليوم الأول ولا التاني لمن اللابتوب كان على المسرح، وده لجهاز كل قصتو الذكاء الاصطناعي على الجهاز، العرض الأنا كنت عاوزو أكتر شي. ومسارا الفنتك والتعليم كمّلو أربعة أيام جلسات بدون إعلان قطاعي واحد، زي كل نسخة فاتت، وأصعب شوية تفسّرو في الأسبوع الاشترت فيهو المملكة خمسة مليون مقعد تدريب.

الأسبوع طلّع سبعتاشر إعلان بنية تحتية، وأربعتاشر برنامج مهارات، وإحداشر صفقة مغامر، وخمسة نماذج. المملكة اشترت حوسبة وطلاب، واشترت شوية بس من البرمجيات البينهم.

النموذج المفتوح

عاوز أكون حريص هنا، لأنو ده البند الأنا بهتم بيهو أكتر شي، فهو البند الأنا أقرب أبالغ فيهو.

أوزان M3 مفتوحة معناها فريق في جدة أو الخرطوم يقدر يسحبها ويشغّلها ويضبطها وينشر تقييم بدون ما يستأذن زول. وسوق النماذج العربية ما كان فيهو نماذج مفتوحة كتيرة. وبيفرق السنة دي أكتر من السنة الفاتت، لأنو النماذج الما مفتوحة بقت في كل حتة: ALLAM عبر Bedrock وFoundry، وReflection على حديد HUMAIN، وGrok موعود على مستوى الدولة. كل واحد من دي إيجار. وM3 هو الوحيد البتقدر تمسكو.

وبيفرق أكتر بعد اليوم الرابع. خمسة مليون زول قربو يتدربو على منصة زول ما. ولو النموذج العربي التحت التدريب ده نموذج بتأجرو بس، المهارة دي قابلة للنقل لمورّد واحد بالضبط.

وهل بيوصّل أو لا، بيتوقف على تلاتة حاجات HUMAIN ما نشرتها الأسبوع ده: شروط الترخيص، جودة الأوزان، وبيانات التقييم. حنشغّلو على خط توليد الوحدات العربية عندنا في نفس اليوم البيصير فيهو قابل للتحميل، وحننشر النتيجة، بما فيها الحاجات الما بيقدر عليها.

رأيي

الأسبوع فيهو نمط واحد. المملكة بتشتري جانب العرض من الذكاء الاصطناعي بحجم وسرعة أسواق قليلة جداً عملتها: كهرباء، أراضي، مراكز بيانات، مناطق سحابية، مسرّعات، تجميع خوادم ولابتوبات محلي، ودحين عدة ملايين مقعد تدريب. وبتعملها عبر رائد سيادي، ومشغّلين وطنيين اتنين، ومتكاملين محليين زي عِلم بيلمسو أصلاً عشرات الملايين من المواطنين، وكل hyperscaler ومصنّع شرائح عندو منطقة سعودية في خططو. وعنقود AMD الشغّال في الإنتاج دليل انو جزء من ده بيتحوّل لواقع.

الحاجة الواقفة بين الحوسبة والطلاب رفيعة. نموذج واحد بأوزان مفتوحة، ومنصة صوت، وحزمة إنتاجية، وشوية وكلاء مؤسسيين، وجهاز واحد البرنامج البيعرّفو بعدو سنة، وإحداشر جولة تمويل. البنية التحتية لازم تجي أول والمهارات لازم تجي بدري، فأنا ما بشتكي من الترتيب. بس أغلب التمنتاشر مليار مباني عندها تواريخ، والخمسة مليون وعد ما زول حيدقّقو، والأسئلة المفتوحة هي شنو الحيشتغل في المباني دي، بأي لغة، وهل زول حيقيّمو قدام الناس.

وفي سؤال زايد السنة دي، الجدول سألو وما زول جاوبو على المسرح. حدث ضيّع موعدو بسبب حرب إقليمية قضى أربعة أيام بيلتزم بغيغاواطات لغاية ٢٠٣٣ ومقاعد تدريب لغاية ٢٠٣٤. وكل حاجة في الخط الزمني تحت بتفترض انو المضيق بيفضل مفتوح.

حقوق الصور: أفق الرياض من عمل mo--، ملكية عامة. خريطة مضيق هرمز من عمل Goran tek-en، رخصة CC BY-SA 4.0. شعارات الشركات عبر ويكيميديا كومنز، ملكية عامة أو Apache 2.0 حسب ما هو موضّح، ومستخدمة للتعريف التحريري؛ وكلها تبقى علامات تجارية لأصحابها.